Тогуз-Торо району
Аянт
3 816 км²
Тургун
28 644
Түзүлгөн жылы
1935
Сүрөттөмө
Тогуз-Торо району Жалал-Абад облусунун түндүк-чыгыш бөлүгүндө жайгашкан. Аймак негизинен тоолуу рельефтен жана өрөөндөрдөн турат. Райондун жаратылышы бийик тоолору, жайыттары, токойлору жана кооз капчыгайлары менен айырмаланат. Райондун социалдык-экономикалык өнүгүүсүндө тоо-кен өнөр жайы, айыл чарбасы, мал чарбачылыгы жана жайыттарды пайдалануу негизги багыттарды түзөт. Тогуз-Торо району Кыргызстандын алтын өндүрүү тармагында өзгөчө орунга ээ. Аймактагы белгилүү кендердин бири — Макмал алтын кени. Макмал алтын кенинин базасында алтын өндүрүү иштери жүргүзүлүп, райондун өнөр жай тармагынын калыптанышына жана экономикалык активдүүлүктүн өсүшүнө таасирин тийгизип келет. Райондун туристтик потенциалы да жогору. Тогуз-Торонун аймагындагы өзгөчө жаратылыш ландшафттары, тоолору жана тарыхый-маданий мурастары экотуризмди, тоо туризмин жана ички туризмди өнүктүрүүгө мүмкүнчүлүк берет. Райондо “Саймалуу-Таш” мамлекеттик жаратылыш паркы жайгашкан. Саймалуу-Таш дүйнөгө белгилүү аска бетиндеги байыркы сүрөттөрү менен айырмаланган тарыхый-маданий жана жаратылыш мурастарынын бири.
Тарых
Тогуз-Торо району 1935-жылы негизделген. Административдик-аймактык реформалардын алкагында анын курамы бир нече жолу өзгөргөн: 1939-жылы Тянь-Шань облусуна кирген. 1962-жылы район жоюлуп, Ак-Талаа районуна кошулган, бирок 1966-жылы кайрадан өзүнчө район катары калыбына келтирилген. Кийинки жылдары Нарын (1970) жана Ош (1988) облустарынын курамында болуп, 1990-жылы жаңыдан түзүлгөн Жалал-Абад облусунун курамына биротоло берилген.